Malaybalay City, Bukidnon – Nikabat sa 34 ka mga nagkadaiyang klase sa tag-as ug mugbo nga mga armas ug usa ka Improvised Explosive Device (IED) ang apil sa gitahan sa 130 ka mga miyembro ug tig-suporta sa teroristang CPP-NPA sa lungsod sa Sumilao, Bukidnon.
Matud sa 403rd Infantry Brigade nga gikan sa lagyong barangay sa mao nga lungsod ang mga nitahan ngadto sa mga local nga otoridad ug 1st Special Forces Battalion kagahapon didto sa Municipal Gymnasium.
Nasayran nga apil sa mga nga nitahan ang duha ka regular CPP-NPA members, 35 ka miyembro sa Militia ng Bayan, ug 93 CPP-NPA mass base supporters kon miyembro sa mga Underground Mass Organizations.
Matud sa 403rd nga nitahan kini human ang gipahugtan sa kasundaluhan ang Community Support Program ug ang focused military operations batok sa CPP-NPA nga naghulga sa Northern Bukidnon.
Gi-uluhan ang mao nga kalihukan nga “Kagsabuwa Para Hu Kalinaw” (Unity for Peace), nga gipangunahan ni Brigadier General Eric C Vinoya AFP, Commander sa 403rd Infantry “Peacemaker” Brigade ug Sumilao Mayor Jose Antonio A. Villo.
Highlight usab sa mao nga aktibidad ang Oath of Allegiance sa 130 ka indibidwal ngadto sa gobyerno ug ang pagsunog sa CPP-NPA flag.
Sa iyang mensahe, gidayeg ni Vinoya ang mga ni-surrender nga mga kanhi CPP-NPA terrorists members ug supporters.
Gipasabot usab niini ang Comprehensive Local Integration Program sa gobyerno alang sa mga CPP-NPA terrorists nga mubalik sa sabakan sa gobyerno.
