340 ka mga empleyado sa rehiyon dose ginpaidalom sa Employees Compensation orientation.

Nagalab-ot sa 340 ka mga empleyado sang 188 ka mga establishemento sa rehiyon dose ang ginpaidalom sa Employees Compensation Program orientation subong nga first quarter sang tuig.
Katuyuan sang ECP lecture nga mahatagan sang ihibalo ang publiko angot sa kaundan sang probisyon sang Presidential Decree No. 626 ukon mas kilala nga Employees’ Compensation and State Insurance Fund.
Ginhatagan man punto sa orientation ang paglakip na sa nasambit nga programa sang mga self-employed workers kag pagsiguro nga may kahilabtanan sa trabaho ang pagkadisgrasya kag balatian ilabi na subong nga panahon sang COVID-19 pandemic.
Nahibaluan nga sang Setyembre 2020, nagpasar ang ECC Board sang Resolution 19-03-05 nga sakop na ang mga self-employed workers sang benepisyo kag serbisyo sang EC program.
Ginpabalo man ang mga partisipante sang serbisyo sa idalom sang Quick Response Program (QRP) kag Katulong at Gabay sa Manggagawang may Kapansanan (KaGabay) Program sang ECC nga nagahatag sang dugang nga benepisyo sa mga empleyado nga nakaangkon sang work-related disabilities.
Samtang lakip sa benepisyo nga makuha ang QRP cash assistance, physical restoration paagi sa occupational therapy kag paghatag sang aparato, skills kag livelihood training.
Ginsiguro naman ni Employees Compensation Commission Executive Director Stella Zipagan-Banawis nga padayon nga pasanyugon sang komisyon ang programa kag serbisyo agud mabuligan ang mga empleyado nga nadisgrasya, nagbalatian kag napatay tungod sa trabaho nga makakuha sang nagakaigo nga benepisyo kag serbisyo sa EC Program.

Facebook Comments