General Santos City—Andam na nga modawat og mga estudyante nga gusto magkuha ug Technical Vocational program sa Technical Education and Skills Development Authority TESDA ang mga eskwelahan sa rehiyon. Anaa sa kapin 79 ka mga programa sa TESDA nga nakasentro sa konstruksyon, agrikultura, cookery, driving, dressmaking ug uban pang mga skills training ang paga-ablihan.
Luyo sa COVID-19 pandemic gipaniguro sa TESDA nga luwas ug masunod sa health protocol ang mga eskwelahan nga mag-abli sa maong mga programa. Sama na lamang matud pa sa pagbutang ug handwashing area, social distancing, pagmonitor sa mga temperature sa mga magsulod, pagsul-ob ug face mask ug face shield, paglimita sa mga mosulod sa eskwelahan ug paggamit ug mga online platform alang sa klase sa mga benepisyaryo sa programa.
Kung kahinumduman nga una nang gisaad ni TESDA 12 Regional Director Rafael Y. Abrogar II nga magsunod sa tanan nga requisitos ang TESDA aron nga maablihan ang mga programa ug makatabang sa pagbangon sa mga naapektuhan sa pandemya.
Alang sa mga gusto mo-avail sa programa sa TESDA mamahimo lang nga mahidangat sa mga TESDA office nga duol sa ilang lugar. Samtang apil usab sa mga mag-abli sa mga programa ang mga eskwelahan nga anaa ilawom sa TESDA Dose apil na dinhi ang mga TESDA Provincial Training Center sa rehiyon.
