37 ANYOS TAGPUSIL-PATAY SA RIDING IN TANDEM SA KM. 1, NATIONAL HIGHWAY, SURIGAO CITY
Tagkilaya an biktima na si Villezel Silvoza Villegas, 37 anyos, minyo, residente sa Silay Hills, Brgy. Taft, Surigao City. An mga suspek, duha ka layaki na nagsakay nan kolor puya na motorsiklo, wayay plate number.
Sa inisyal na imbestigasyon nan PNP, alas 3:15 kaganinang hapon, si Villegas an nagsakay sa ija kolor itom ug yellow na motorsiklo pasingod sa Surigao City proper. An mga suspek na nagsakay sa laing motorsiklo an nagsunod sa biktima. Pag-abot sa tagkahitabuan sa Km. 1, National Highway duol sa Surigao Medical Center, isa sa mga suspek an mipusil kan Villegas sa makadaghan na higayon na miigo sa lain-laing bahin sa lawas niini. An biktima an misuway pa sa pagliko sa ija motorsiklo pero natumba na ini sa semento na dayan. Si Villegas an dead on the spot sa panghitabo.
Nakuha gikan sa tagkahitabuan an 5 ka basyo sa bala sa .45 kalibre sa armas. An patayng lawas an tagpahimutang kuman sa isa ka punerarya sa Km. 3 National Highway samtang nagpadajon pa an imbestigasyon sa insidente.
