4 ka mga barangay kag 3 ka Purok sa Polomolok, South Cotabato, ipaidalom sa 14 days pre-emptive lockdown.

16

Ipatuman ang katorse ka adlaw nga preemptive localized lockdown sa apat ka mga barangay sang Polomolok, South Cotabato kag 3 ka mga purok nga magaumpisa subong nga adlaw, Agosto 19 tungod sa lima na ka kaso sang nagpositibo sa coronavirus ukon COVID -19 nga narekord sa banwa.
Suno kay Polomolok Mayor Honey Lumayag Matti ang nasambit nga mga barangay amo ang Brgy. Cannery, Poblacion, Silway 8 kag Magsaysay, Purok Cassava sang Brgy. Maligo, Purok 1 & 4 sang Koronadal Proper sa diin naghalin ang lima ka kaso sang COVID-19 kag nacontact trace.
Katuyuan sang nasambit nga tikang sang LGU suno sa alkalde nga mapunggan ang paglapta pa gid sang nasambit nga balatian sa banwa.
Sa pre-emptive lockdown isa lang ka tawo sa balay ang pahanugutan nga maggwa agud nga mamakal sang kinahanglanon suno kay Mayor Matti.
Ginkumpirmar man sang alkalde nga ang case no. 4 nga 6 ka bulan nga lapsag ang bata sang case no. 3 nga may gintambongan nga party kag ang case no. 5 ang may kontak sa case no. 3 kag ang case no. 6 kaupod sa trabaho sang case no. 5 nga pareho medical practitioner nga yara naman suno pa sa maayo nga kondisyon kag nakaisolate na.
May-angot sini, ipatuman man ang curfew hour sa banwa halin alas 7 sang gab-i tubtob alas 5 sang aga nga magaumpisa naman subong nga adlaw.
Sa subong suno kay Mayor Matti wala pa sang deklarasyon nga may local transmission na sang COVID -19 sa Polomolok tungod padayon pa ang imbestigasyon kag ang Department of Health lang suno pa ang makadeklarar.
Padayon naman nga ginahingyo sang akalde ang kooperasyon sang publiko sa ginapatuman nga mga health protocols agud malikawan kag mapunggan ang paglapta sang COVID-19.
Ginpreparahan naman sang LGU Polomolok suno sa iya ang ayuda sa mga maapektauhan nga sector sang pre-emptive lockdown.

Facebook Comments