GI-ILA sa Mindanao Development Authority o MinDA ang lungsod sa Impasug-ong, Talakag, Sumilao og Lantapan o IMTASULA sa Bukidnon nga mahimong major Vegetable og High Value Crops Production Area, kini ang gibutyag ni MinDA chair, Secretary Emmanuel F. Piñol, Ph.D., atubangan kang Governor Jose Ma. R. Zubiri Jr., og sa mga hingtungdang mayores sa upat ka mga lungsod, uban sa mga hepe og representante sa Provincial/Municipal Agricultures Office og ubang departamento sa Kagamhanang Probinsyal, panahon sa coordination meeting nga gipahigayon kaniadtong, Huwebes, petsa 16 ning bulan sa Hulyo 2020 sa PPDO Conference Room, PPDO Building, Provincial Capitol, Malaybalay City, Bukidnon.
Sa inisyal nga resulta sa Geo mapping nga gihimo sa MinDA sa nilabay nga semana, gi-presentar niini ang naila nga dose (12) ka mga barangay sulod sa nahisgutang mga lungsod nga mao ang barangay sa Impalutao, Poblacion, Intavas, og Kibenton sa lungsod sa Impasug-ong, barangay San Miguel, Miarayon og Lirongan sa Talakag, barangay Licoan og Lupiagan sa Sumilao og barangay Victory, Cawayan og Kibanggay sa lungsod sa Lantapan nga diin magagikan ang produkto og mahimong pinakadako nga supplier sa Mindanao og sa tibuok nasud Pilipinas.
Gawas niana giila usab ang mahimong tinubdan sa suplay sa tubig nga mao ang giingong importante kaayo alang sa dakong produksyon sa utanon pinaage sa pag instalar sa irigasyon.
