General Santos City–Mitahan sa ilang mga kaugalingon ang upat ka mga myembro sa NPA nga sakop sa guerilla front 71 dala ang ilahang mga armas sa sabakan sa goberno niadtong milabay nga adlaw.
Gi-ila Lt. Jerry Maborrang, tigpamaba sa 73rd IB, Philippine army ang mga nasangpit nga silang alyas Kawag ug alyas Rebreb, Pulos nanimuyo sa Upper Suyan, Malapatan, Sarangani Province nga nag dala sa ilang mga armas nga M16 ug 38 revolver sa scout platoon sa 73rd IB sa sitio Kakob, Barangay Upper, Suyan, Malapatan, Sarangani Province, niadtong Enero 19.
Samtang sa misunod nga adlaw mitahan usab sa ilang kaugalingon ang laing duha ka mga NPA nga silang alyas Jason ug alyas Rusi nga mga residenti sa brgy. Kihan, Malapatan, Sarangani Province sa mga tropa sa Delta Company sa 73rd IB sa Brgy Little Baguio, Malita, Davao Occidental dala ang ilang mga armas nga carbine riffle ug 357 nga kalibre sa pistola.
Sumala pa ni Lt. Maborrang nga mitahan matud pa ang mga nasangpit nga NPA tungod sa tumang kakapoy, kagutom ug kahadlok nga matapay sa operasyon. Samtang usa usab ka rason mao ang wala pagtuman sa NPA sa ilang saad nga suportahan ang ilang mga pamilya. (Dave Silagan)
