4 ka saksi sa pagpatay sa SK Chairman, mikoordinar sa PNP

Davao City – Posibleng madugangan pa ang mga witness nga mokoordinar sa kapulisan sa nagpadayon karong imbestigasyon sa pagpatay kang Jorlan “Bon” Sacay, ang Sangguniang Kabataan (SK) Chairman sa Barangay Binuangan, Maco, Davao de Oro, niadtong July 18, 2023.

Sa interbyu sa DXDC RMN Davao kang PLtCol. Emerson Pugong, Chief of Police sa Maco Municipal Police Station, iyang gibutyag nga adunay upat ka mga saksi ang nakig-alayon karon sa kapulisan pinaagi sa paghatag sa ilang affidavit.

Nasayrang miabot na usab sa P2.5 million ang reward money gikan sa provincial ug municipal government alang sa makatudlo sa responsable sa krimen ug aron makab-ot ang hustisya sa kamatayon sa youth leader.

“Dako pud og tabang na (ang reward money) kay ang mga tao inspired pud sila nga magtabang sa imbestigasyon. Actually, before sa reward money, naa na may nag-voluntary gyud nga maghatag og (impormasyon) as witness nato,” sulti sa police official.

Sa pagkakaron, wala pa na-establisar sa kapulisan ang motibo sa krimen apan lakip sa anggulo nga ilang gitutokan mao ang involvement ni Sacay sa politika.

RadyoMaN Kirby Manzon