TACLOBAN CITY – Namumutang na ha kostudiya han CSWDO women and children shelter ha syudad han Tacloban an upat nga biktima han child pornography nga na-rescue han National Bureau of Investigation- Anti-human trafficking division dida han Pebrero 23, 2018 pinaagi han ira ginbuhat nga entrapment operation.
Duha ha upat nga biktima in mga minor de edad.
Sumala kan Carmela Bastes, Head han Women and Children Shelter, gin-papailarom na ha psychosocial counseling an upat nga biktima agud mabuligan hira nga mawara an trauma nga dara han ira na-eksperyensya.
Nakipag-sumpayan na gihapon an CSWDO ha eskwelahan han duha nga minor de edad nga biktima agud maipadayon nira an ira pag-aram ilabi na nga graduating an usa nga biktima.
Gintutugutan naman han CSWDO an mga pamilya han mga biktima nga bumisita. Kun mahihinumduman nga paryente la mismo han iba nga biktima an usa ha tulo nga suspek nga nadakop.
Ha pagkayana in naka-inquest case na an ginpasaka nga kaso kontra ha tulo nga suspek.
Sumala kan Bastes, ini na an ika-upat nga kaso han human trafficking nga naitala ha syudad han Tacloban.
