4 nga sarakyan nagbungguay, 4 anyos nga bata samaran

TACLOBAN CITY – Nagbungguay an uupat nga sarakyan ha National Highway Han Brgy. Dolores, Pinabacdao, Samar, kakulop han kulop.

Kun diin samaran an 4 anyos nga bata nga ginkilala nga hi Stizzy Ann Nicole Araza, 4 anyos, usa nga daycare pupil ngan residente ha nasabi nga lugar.

Ginkilala naman an mga driver han mga sarakyan nga hira Nasareno Ollaras, 43 anyos, may asawa, hiya an nagmamaneho han sarakyan nga Wing Van Truck; Roman Elmer Penalosa, 43 anyos, hiya an nagmamaneho han Toyota Hi Ace Grand Tours Van; Johnny Gabon Tanlada, 39 anyos may asawa ngan residente ha Brgy. Calampong, Pinabacdao, Samar, hiya an nagmamaneho han Nissan nga sarakyan; ngan usa naman nga multicab an apektado han aksidente.


Basi ha inisyal nga imbistigasyon han Pinabacdao PNP, an tulo nga sarakyan amu an Wing Van Truck, Toyota Hi Ace Grand Tours Van, ngan an multicab in ginbabaybay an kakalsadahan tikang ha Tacloban City tikadto ha Buray, samtang an Nissan naman nga sarakyan in tikadto ha Tacloban City.

Mapreno na unta an driver nga hi Jose han iya wing van truck pero diri nagana an iya pedal brake, malaksi pa gud an iya padalagan.

Nabunggo niya an mga sarakyan nga nauuna ha iya amu an Grand Tours Van ngan an multicab. Nahihapil ini nga duduha nga sarakyan ha mga panimalay ha ligid han kalsada.

Ha kakusog han impact han pagkabunggo, naapil an sarakyan nga Nissan nga natapo ha tutulo nga behikulo.

Nabunggo pa han multicab an 4 anyos nga bata, dayon ini igindara ha Rural Health Unit pero iginrefer dayon ini ngadto ha Eastern Visayas Regional Medical Center (EVRMC) para matambal.

Facebook Comments