Lauman matud pa ang mas grabeng opensiba sa Armed Forces of the Philippines kon AFP batok sa New Peoples Army (NPA).
Kini ang hulga sa AFP sa paghuman sa ceasefire kagahapon.
Matud kang AFP Spokesperson Bgen Edgard Arevalo, nga lauman na sa NPA ang mas grabeng opensiba sa militar nga dili na kinahanglan pang imando ni AFP Chief of Staff Lt. Gen. Felimon Santos.
Samtang sa interview sa RMN Malaybalay ngadto kang Cpt. Ryan Layug, ang civil military operations officer ug spokesperson sa 403rd Brigade gibutyag niini nga automatikong subling nibalik ang focused military operation sa kasundaluhan human sa paglibkas sa ceasefire.
Gipahayag ni Cpt. Layug nga walay natalang kasupakan ang NPA sa ceasefire ilawom sa ilang area of operations apan gisaway niini ang pagpatay sa mga NPA kang IP mandatory representative Sammy Diwangan sa Canangaan, Cabanglasan, Bukidnon kaniadtong Enero 4.
Hugot nga gipahayag ni Layug nga usa ka kasupakan sa international humanitarian law kon IHL ang pagpatay sa mga NPA ngadto sa mga sibilyan nga walay gikasukol.
Gidugang pa ni Cpt. Layug nga panahon sa ceasefire adunay pagsulay matud pa ang grupo NPA sa pagpangrecruit apan napugngan kini tungod sa Community Support Program kon CSP sa kasundaluhan.
Gi-anunsiyo usab sa CMO nga aduna silay namonitor nga usa ka taas nga lider sa NPA sa Bukidnon ang nitahan dili pa lamang dugay.
Sa karon dili pa mahatag ni Layug ang dugang detalye kalabot niini.
