Nanawagan karon ang commander sa 403rd infantry brigade, Philippine Army sa Local Government Unit kon LGU-Valencia, Commission on Human Rights kon CHR 10 nga muhimo ug pag-imbestiga sa nahitabong pagpatay sa New Peoples Army kon NPA ngadto kang Pablo Omblero , miyembro sa Civilian Armed Forces Geographical Unit (Cafgu) niadtong Oktubre 27 ning tuiga sa Batangan, Valencia City.
Sa press conference gibutyag ni 403rd Brigade Commander Brigadier General Edgardo de Leon nga iyang girekomenda sa LGU Valencia nga muhimo ug international humanitarian law kon IHL fact finding investigation.
Matud ni de Leon nga dili na unta angayan nga muhimo pa siya ug pormal nga sulat nga ipadangat sa LGU tungod kay trabaho niini ang pagprotekta sa iyang constituente apan tungod kay wala pay lakang nga gihimo karon,maong iyang sulatan ang Valencia aron matutukan kini.
Tumong niini aron masayran ang tulubagon sa mga miyembro sa NPA nga nihimo sa mao nga krimen nga usa ka kasupakan sa IHL.
Nanawagan usab si General de Leon ngadto sa CHR 10 nga muhimo ug pag-imbestiga sa mao nga kaso. Gipangugat sa heneral nga dili na dapat pa nga muhulat ug reklamo ang mao nga buhatan tungod kay trabaho niini ang pagpa-imbestiga sa IHL violation.
Gawas niini, nanawagan si de Leon sa komunistatong grupong NPA nga angayang bayran niini ang kadaut sa mga ekipo nga gipangsunog ug pagpatay sa mga non-combatant nga klarong kasupakan sa IHL.
Una nang nanawagan si Elizabeth dela Torre ang kaipon sa CAFGU nga gipatay ngadto kang Valencia City Mayor Azucena Huervas nga tabangan siya nga makab-ot ang hustisya.
