General Santos City—Samdan nga gidala sa Dr. Jorge Royeca Hospital dinhi sa Gensan ang usa ka Johny Manimo, 41 anyos, nga taga Barangay Malalag Cogon, Malungon, Sarangani Province human gidunggab sa iyang silingan alas 5:30 ang takna sa hapon didto mismo sa ilang panimalay.
Subay sa report nga nakalatid sa Dr. Jorge Royeca Hospital nasayhran nga gisulong sa suspek ang biktima sa ilang balay. Gilabayan matud pa sa suspek ug bato ang balay sa biktima, didto na migawas si Manimo dayon nakigsinumbagay sa suspek.
Dungan niini kalit mibunlot ug kutsilyo ang suspek dayon gidunggab sa biktima igo sa managlahing parti sa lawas.
Paspas nga gidala sa ospital ang biktima aron mapailawom sa medikasyon. Sa karon nagpadayon pa ang gihimong imbistigasyon sa kapulisan sa maong insidenti.
