41 anyos nga mag-uuma patay human gidunggab

17

General Santos City—patay nang nakaplagan ang usa ka 41 anyos nga mag-uuma daplin sa sapa sa may barangay Mudan, Glan, Sarangani Province.

Giila ang biktima nga si Ronelio Motoy, 41, residenti sa Prk. Malaumon, Barangay Mudan, Glan.

Alas 7:00 ang takna sa buntag sa nakalabayng adlaw dihang nakaplagan nalang sa usa ka Rafael Flores, residenti sa samang lugar ang biktima nga nagluy-od na daplin sa sapa sa ilang lugar ug wala nay kinabuhi.

Gilayon kining mireport sa Glan Municipal Police Station aron maimbistigahan ang patayng lawas sa biktima.

Sa inisyal nga imbistigasyon sa kapulisan nasuta nga dunay samad dinunggaban ang nasangpit nga biktima ngadto sa iyang ulo nga posibling hinungdan sa iyang kamatayon.

Ang pamilya sa biktima nagbutyag nga sila blangko sa posibling motibo sa krimen gumikan wala man silay nasayran nga nahimong kalaban ang nahisgutan sa ilang lugar.

Ayha nakaplagan ang patayng lawas sa biktima, sila natingala lang nga wala kini nakauli sa ilang panimalay. Kakurat nalang sila dihang nadawat ang impormasyon nga patay na kining nakaplagan.

Sa karon nagpahigayon nag pakuting imbistigasyon ang Glan Municipal Police Station kalabutan sa insidenti aron nga masayran ang suspek nga responsabli sa krimen.

Facebook Comments