Nakalista na ang Department of Labor and Employment sa Central Visayas ug 42 ka mga establisamento sa rehiyon 7 nga nagpraktis ug labor-only contracting nga paagi sa ilang trabahante .
Gibutyag sa Information Officer sa DOLE-7 , Luchel Taniza nga pasiuna nila kining nalista subay sa kamanduan ni Presidente Rodrigo Duterte nga ilista ang mga kompaniya nga nalambigit sa labor only contracting aron sila maoy sunod nga tutokan sa gobyerno .
Gamitan ni sila ug “tokhang” nga nagpasabot ug toktokon ug hangyoon nga moundang na sa maong praktis ngadto sa ilang mga trabahante .
Ang DOLE-7 mohimo pa ug final nga listahan sa pangan sa mga kompaniya nga nisagop sa maong paagi , una kini iduso ngadto sa buhatan sa Presidente .
Subay niini , gipahibawo usab sa DOLE-7 nga di momenos 8,000 na ka mga trabahante ang nahimo nang regular sa ilang trabaho subay sa mando sa DOLE.
