Mukabat sa 42 ka pamilya ang gihataga’g tabang sa RMN DXMB Malaybalay kaniadtong adlaw nga Sabado sa Purok 2, Poblacion, Valencia City.
Ang maong mga pamilya biktima sa sunog nga nahitabo kaniadtong Marso 4 ning tuiga.
Sa taho sa Barangay Poblacion, mukabat ngadto sa 200 kapin kon kulang ka indibidwal ang apektado sa mao nga sunog.
Apil sa mga gitunol sa RMN Malaybalay ang mga grocery items ug goods, tubig ug mga used clothing. Nadawat sa matag pamilya ang duha ka kilong bugas, noodles, sardinas, sabon, toothpaste ug uban pa.
Gikalipay usab sa maong mga pamilya ang tabang nga gitunol sa RMN DXMB.
Ang maong Operation Tabang sa nasunugan sa RMN gipaluyuhan sa Tatak RMN Fans’ Club, Inc., Tatak Tisoy Marketing, 648 online fans ug mga suking tigpamanaw sa RMN Malaybalay.
Nasayran nga nisaka na ngadto sa 2.5 milyon pesos ang natalang damyos sa mao nga sunog.
Matud sa Bureau of Fire Protection kon BFP Valencia nga gilamoy sa kalayo ang 28 ka pinuy-anan.
Nagbilin usab kini ug usa ka patay nga bata nga nailang si John Michael Catao ug pagkasamdan sa usa ka Regie Palban.
