Davao City – Gimando karon ni Davao City Mayor Sara Duterte-Carpio nga ipailawom sa 14 days quarantine inig uli na sa syudad, ang mga indibidwal nga nagpahigayon og ‘Run, Sara, Run’ Caravan sa Luzon.
Matud sa Alkalde, gipugngan ang maong grupo sa ilang paglakaw tungod sa delikado nga sitwasyon labi na nga nagkataas ang kaso sa Coronavirus Disease 2019 (COVID-19) sa kaulohan, apan midayon gihapon ang mga nahisgutan.
“Giingnan napud nato ang president sa Liga ng mga Barangay, gi-remind nato sila nga i-flag silang tanan. There’s 43 of them sa atong listahan. I-flag silang tanan pag-uli nila because they should be on 14-day quarantine,” segun sa Mayor.
Segun sa Alkalde, gisuportahan na lamang usab niini ang ilang lakaw tungod kay dili mamahimong pasagdan ang nahisgutan sa kaulohan.
“Giingnan nalang nako sila na magsulay ‘mi og pagpangita og suporta kung unsay masuporta namo sa inyuha because dili nako kaya nga pasagdan nalang sila nga ingon ana,” matud ni Duterte-Carpio.
Ginaplastar na usab karon ang lugar kung asa i-quarantine ang kapin 40 ka indibidwal nga gilangkuban sa mga kapitan, kanhi kapitan, kagawad ug pipila ka mga kabanay niini.
Gikasubo sa Alkalde nga walay maminaw kaniya kung paundangon ang maong kalihokan bisan og nagsulti na siya nga dili magpapili pagka-presidente sa eleksyon sa sunod tuig 2022.
RadyoMaN Kirby Manzon
