Davao City – Mokabat sa 43 ka mga munisipalidad ug unom ka syudad ang inisyal nga gikunsidera sa kapulisan isip election watchlist areas (EWAS) dinhi sa Rehiyon XI.
Sa record sa Police Regional Office 11 (PRO-XI), adunay pito ka mga distrito ang nahilakip sa Davao City nga mao ang Toril, Tugbok, Marilog, Baguio, Calinan, Paquibato ug Baguio District samtang adunay duha sa Davao Occidental nga mao ang Jose Abad Santos ug Malita.
Sa Davao del Sur, gipailawom sa category 1 ang Malalag, Hagonoy ug Padada, anaa sa category 2 ang Kiblawan, Magsaysay ug Matanao samtang category 3 ang Bansalan, Sta. Cruz ug Digos .
Sa Davao del Norte gipailawom sa EWAS ang Brgy. Pandapan ug Brgy. San Agustin sa Tagum City, 20 ka mga barangay sa Panabo, lakip na sab ang Asuncion, Carmen, Kapalong, New Corella, San isisdro ug Talaingod.
Sa Davao Oriental parte sab ang Mati City, Lupon, Banay-banay, Gov. Generoso, Tarragona ug Manay samtang apil ang tibuok 11 ka mga munisipalidad sa Compostela Valley Province.
Gipasabot ni PRO-XI spokesperson P/Chief Insp. Jason Baria nga wala pa kini approval gikan sa Division Commander gani walay naspesipika sa ubang munisipyo ilabi na ang mga barangay.
Dugang ni Baria nga possible pa kining makuhaan o madungagan depende sa resulta sa ilang himuong ebalwasyon ug monitoring sa political-related violence sa mga nasangpit nga lugar.
RadyoMaN Jason Amisola
