Patay ang isa ka persona, matapos nga lab-on sa bahin sang Sitio Lake Puguan, Barangay Ned, Lake Sebu, South Cotabato, pasado alas 3 sang hapon kahapon nga adlaw, Agosto 31, 2021.
Ginkilala ang biktima kay Roger Mansibad, Alias Jorge, 45 years old, single, temporaryo nga nagatinir sa nasambit nga lugar kag residente sang Jose Abad Santos Davao Del Sur.
Samtang ang suspek ang ginkilala kay Eugenio Hillria Pavillon, 40 years old, mangunguma kag residente sang Blok 4, Barangay Ned, Lake Sebu, South Cotabato.
Sa imbestigasyon sang Lake Sebu MPS, bag-o pa man ang insidente ang suspek kag biktima ang nagainom-inom sang “Tuba” sa farm house sang biktima upod ang isa ka Rene Boy, yara sa legal nga pang-edaron kag residente sang Sitio Lake Puguan sa nasambit nga barangay.
Alas 9:00 sang gab-i sang Agosto 30 nabilin ang biktima kag suspek nga nagainom-inom kag tungod sa kahulugbon nagluntad ang wala pag-intiendihanay sa tunga sang duha nga nagtulod sa biktima nga si alias “Jorge” nga kuhaon ang bolo kag lab-on kuntani si Pavillon, apang naagaw sini ang bolo kag ginlabo ang biktima sa talinga kag abaga nga nangin tunaan sang hinali nga kamatayon ni alyas Jorge.
Gilayon naman nga nagpalagyo ang suspek.
Nakuha sa crime scene ang isa ka bolo nga may dugo nga ginapatihan gingamit sang suspek.
Nagpatigayon naman sang hot pursuit operation ang kapulisan sa posible pag-aresto sa suspek. Ginapreparar na ang kaso nga ipasaka batok sa suspek.
