Mas taas ang kaso sa dengue karong tuiga sa probinsya sa Bukidnon.
Sa interview sa RMN Malaybalay ngadto kang Gabriel Jay Pagote, ang Provincial Dengue Coordinator sa Provincial Health Office – Bukidnon gibutyag niini nga gikan Enero 2019 hangtod July 15, 2019 anaa na sa 4,534 ka kaso sa gituhuang dengue sa probinsya sa Bukidnon.
Matud ni Pagote nga sa mao nga ihap, nag-una ang siyudad Malaybalay nga adunay 829 ka kaso, ug gisundan sa dakbayan sa Valencia nga adunay 826 ka kaso.
Samtang ang nag-unang lima ka mga lungsod sa Bukidnon nga adunay taas nga kaso sa gituhuang dengue ang mga lungsod sa Maramag – 484 ka kaso, Quezon – 376, Don Carlos – 328; Manolo Fortich adunay 224, ug 173 sa lungsod sa Kibawe.
Sigun ni Pagote nga mas taas ang kaso sa dengue nga natala karong tuiga kumpara sa susamang panahon kaniadtong nakalabay nga tuig.
Nasayran nga natala sa Enero 2018 hangtod July 15, 2018 ang 2, 394 ka kaso sa tibook probinsya sa Bukidnon.
Buot ipasabot nga halos nidoble ang kaso o anaa sa 89.4 percent ang pagtaas sa dengue karong tuiga.
