TACLOBAN CITY – Naghinulat hin sobra 40 anyos an 457 Agrarian Reform Beneficiaries ha ilarom han Comprehensive Agrarian Reform Program (CARP) tikang ha probinsya han Leyte ngan Southern Leyte, yana nakakarawat na hira hin Certificates Of Land Ownership Award o gintagan hira hin tuna han Department Of Agarian Reform (DAR).
Sumala kan DAR Sec. John Castriciones, ira gin-issue an 429 certificates of land ownership award ngadto ha 457 nga mga benepisyaryo, epektibo nga magigin ira an 638.29 hectares nga tuna.
Dugang ni Castriciones, ginmanduan daw ni Presidente Duterte an DAR nga pakurukusgon an mga serbisyo han departamento ngadto ha mga benepisyaryo.
Gin-abisuhan gihapon niya an mga benepisyaryo nga diri unta igbaligya ini nga katunaan bagkos ig-utilize para makagenerate hin income.
Ha ilarom han Comprehensive Agrarian Reform Law o kun Republic Act No. 6657, igindididiri an pagbaligya han tuna nga cover han CLOA ha sakob han 10 katuig.
Ginwarningan gihapon han DAR an mga parag-uma nga mayada bayolasyon nga magreresulta hin disqualifications ngan pwede makansela an land titles nga ginhatag ha ira pag diri hira magsunod han mga responsibilidad.
