Nagalab-ot na sa 46 ka mga drug offenders ang nakatapos sang 3 ka bulan nga reformatory program sa Balay Silangan Reformatory Center sang South Cotabato nga nahamtang sa banwa sang Tupi.
Suno kay Balay Silangan Center Manager Jonathan Jovero sa nasambit nga numero 25 na ka mga nakagraduate na sa reformatory center ang nagatrabaho na sa gobyerno, lima naman sa mga ini ang nagabulig sa ila family business kag ang iban nagtukod sang kaugalingon nga negosyo.
Ginkumpirmar man ni Jovero nga ang mga naggwa sa Balay Silangan Reformatory Center ang ginhatagan sang tig ten thousand pesos nga cash assistance sang Provincial Anti-Drug Abuse Council ukon PADAC para magamit nga capital sa pagtukod sang ila pangalabuhian.
Ginpahayag niya man nga padayon nga ginamonitor ang mga nakaggwa sa Balay Silangan Reformatory Center.
Samtang sa subong 45 naman ka mga PDL ang nagabug-os sa 2nd batch sang mga narefer sa nasambit nga pasilidad kag ginapaidalom sa programa.
Nahibaluan nga makabenipisyo sa tatlo ka bulan nga mga programa sang nasambit nga pasilidad ang mga anay drug dependent nga nag-apply sa plea bargaining agreement sang korte.
Sakop naman sang reformatory program sa Balay Silangan Reformatory Center ang education, skills and livelihood training, health awareness activities, psychological, spiritual, physical activities, and moral recovery values formation.
Apang ang problema suno kay Jovero ang pagpapanaug sang mataas nga fines sang pipila ka mga judge sa mga PDL nga magkadto sa Balay Silangan Reformatory Center nga nagalab-ot sa P50k tubtob P100k nga una naman nga ginpalab-ot ang nasambit nga isyu sa ginpatigayon nga PADAC meeting.
