GENERAL SANTOS CITY – Nakumpiska sa mga sakop sa Makar Police Station 2 sa pagpanguna ni Police Chief Inspector Patrich Elma ang mukabat sa 265 ka sakong uling daplin sa baybayon sa may Purok Kulasi, Barangay Labangal.
Una nang nakadawat ug report ang Police Station 2 nga matud pa dunay mga bangka nga midunggo sa lugar nga dunay kargang sinakong uling.
Tungod niini girespondihan dayon sa kapulisan ang lugar ug didto nag positibo ang report. Subay sa pagtuki-tuki sa kapulisan sa lugar, gikan matud pa sa Sarangani province ang maong mga uling ug gikatakdang i-deliver sa Gensan Public Market.
Wala hinuoy miangkon sa maong uling ug wala pa masayran kung si kinsay nanag-iya niini gumikan giabandona na sa mga nagdala.
Sa kinatibuk-an anaa sa P42,000.00 ang kantidad sa uling nga nakumpiska sa kapulisan.
Sa karon ang mga uling anaa na sa kustudiya sa Police Station 2 ug gikatakda na kining iturn-over ngadto sa buhatan sa DENR.
For more info’s and updates, like and share our official facebook account : www.facebook.com/ifm91.9Gensanofficial/
