Davao City – Gipasidunggan sa lokal nga panggamhanan ang lima ka mga Outstanding Dabawenyos sa nagkadaiyang propesyon kinsa adunay natunol nga dakung kontribusyon alang sa kalamboan sa dakbayan sa Davao.
Ang mga honorees gipasidunggan atol sa 49th Conferment sa Datu Bago Awards pinangulohan mismo ni Davao City Mayor Inday Sara Duterte-Carpio kinsa nagkanayon nga daku kaayo ang importansya ning maong recognition aron magsilbing inspirasyon ilabi na ngadto sa mga kabatan-onan nga buhaton gayud ang ilang pinakamaayo diha sa ilang mga tahas, kaakuhan ug responsibilidad sa katilingban.
“It’s very important kay gina-recognize nato ilang mga achievements, ilahang mga accomplishments as Dabawenyo or people who chose to be Dabawenyos. Importante na para makita sa mga nagasunod sa ilaha how it is done and ang ilang mga nabuhat will inspire young Dabawenyos to do more and to do their best for the city,” sumala ni Duterte.
Karong tuiga, giila sila si Koronado Apuzen, usa ka manlalaban kun legal practitioner kinsa gipahingusgan ang katungod ug kaayuhan sa mga mamumuo, mag-uuma, mga benepisyaryo sa agrarian reform ug rural cooperatives pinaagi sa community-based farming methods sa plantasyon sa saging.
Laing awardee mao si Ines Mallari, usa ka third generation war-displaced Japanese descendant kinsa usa sa nahimong tulay sa panaghigalaay sa Pilipinas ug Japan pinaagi sa pagpasabot sa kasaysayan ug kultura sa matag nasud.
Usab gi-honor si Datu Rodolfo Mande, usa ka Matigsalug tribal leader gikan sa distrito sa Marilog ning syudad kinsa girekognisar sa padayong pagkugi diha sa pagpromotar sa lumadnong kultura ug kabilin ingon man mapaniguro ang pagkalambigit niini sa hisgutanang ekonomiya, political ug sosyal dinhi sa syudad.
Gipasidunggan usab si Mary Ann Montemayor, kinsa nagpataas sa lebel sa kaamgohan ingon man pag-respetar nato sa potensyal ug kapasidad sa Davao nga makasugakod sa mga importanteng nasyunal ug internasyunal nga mga hagit ingon man pagpromotar sa syudad isip usaka ‘globally competitive destination’ especialmente diha sa natad sa turismo ug pamatigayon.
Last but not the least mao si Antonio Partoza Jr., usa ka visionary entrepreneur ug philanthropist kinsa nagtikad sa iladong Partoza Durian Farm ug advocate usab sa Balay Pasilungan, usa ka privately-funded shelter for the homeless ilabi na alang sa mga street children dinhi sa dakbayan.
“We all have the same aspirations for the city and I invite everyone not just our awardees past and present but those in whose veins run the blood of awardees of 20, 30, 40 years ago,” awhag ni Carpio.
Kahinumdoman nga niadtong Marso 9, 2018 pormal nga gideklara ang historical figure nga si Datu Bago isip bayani sa syudad sa Davao.
Ang Datu Bago Awards usa sa mga annual highlights sa 82nd Araw ng Dabaw Founding Anniversary ingon man gingalan kaniya isip Highest City Recognition alang sa mga nag-unang lungsuranon nga nakatampo ug daku alang sa progreso sa atong syudad denhe sa habagatan.
RadyoMaN Jason Amisola
