Davao City – Nagtoo ang Parents Mobilization Action Group nga dili tanang mga benepisyaryo sa Pantawid Pamilyang Pilipino Program (4Ps) sa nasudnong kagamhanan mga kabus ug gikan sa marginalized sector kun ang gitawag nga ‘poorest of the poor.’
Kumbinsido si PMAG President Febe Matthew nga adunay mga benepisyaryo sa 4Ps nga wala maglisod ug haruhay ang kahimtang sa ilang mga kinabuhi.
Matud ni Matthew nga dili malimod nga may arangan ang nakapahimulos sa 4Ps nga unta gitagana lamang kini alang sa mga pamilyang kabus ug naggilaid sa pagsuporta sa edukasyon ug panglawas sa ilang mga kabataan.
Segun ni Matthew nga pipila sa iyang nasayran nga may mga benepisyaryo dunay nindot ug kumpleto sa mga gamit nga mga panimalay apan nakadawat gihapon sa 4Ps.
Dugang ni Matthew nga dili makasulod ang mga adunay kaya sa kinabuhi sa 4Ps kung walay pabor-pabor nga gibuhat ang mga nagpadagan niining pangkabus nga programa sa nasudnong kagamhanan.
Sugyot karon sa PMAG President ang pag-review sa implimentasyon sa programa aron ang makapahimulos kadto gayung matuod nga kabus ug timawa nga pamilyang Pilipino ug dili kadtong mga arangan.
RadyoMaN Joel Viray
