Davao City – Wala makatabang direkta sa tinuod nga mga kabos ang Pantawid Pamilyang Pilipino Program kun 4Ps sa gobyerno.
Kini ang nakita nga disbintaha ni Parents Movement Action Group Focal Person Febe Matthew nga dili tinuod nga mga pobre ang direkta nakadawat sa tabang sa 4Ps sa kagamhanan.
“Wala makatabang ang 4Ps sa mga kabos kay napunta man sa mga arangan og kinabuhi mao nga dapat mag-evaluate ang DSWD kung okay ba siya then after mag-home visitation para gyod kun tama ba siya nga tagaan ang uban kay ang uban for compliance na lang sila,” sigun ni Matthew.
Sumala ni Matthew nga daghan sa mga arangan mao naman hinoo’y naprayoridad sa tabang ug dili ang mga makaluluoy nga mga pamilya nunot sa pabor-pabor system sa Barangay level.
Aminado si Matthew nga dakong tabang sa naglisod nga mga ginikanan ang binulan nga madawat nila sa 4Ps kay pinaagi iana makatungha ang ilang mga anak ug makapalit sa panginahanglanon sa ilang pagtuon.
Apan ang problema lang daw matud pa mao nga sama ra nga ginatudluan sa kagamhanan ang mga tawo nga magtinapulan ug dili na maningkamot sanglit magsalig naman sila sa madawat matag bulan nga tabang.
Nindot unta ang programa kay nagtumong kini sa pagtabang sa mga walang-wala nga mga ginikanan ug walay kapasidad sa pagpatungha sa ilang mga kabataan apan pakyas ang gobyerno sa pagdapat niini sa angay tabanganan sanglit daghan sa mga arangan og kinabuhi naglipay sa 4’ps sa kagamhanan.
Gisugyot sa Parents Movement Action Group nga mas maayo kun mag-evaluate ang DSWD sa ilang programa aron ilang makita ang mga negatibong dagan ug personal usab magbisita sa kabalayan ang mga social workers sa pasiguro nga walay makaapil nga mga maayo og estado sa kinabuhi.
Pinaagi niini mahimo pa gyod nga epektibo ang implementasyon sa 4Ps sanglit ang tinuod naman nga mga pobre ang matabangan ug dili ang kadtong arangan og kahimtang sa panginabuhi.
RadyoMaN Joel Viray
