KORONADAL CITY- patay ang amahan samtang angol ang mag-inahan niini human nabanggaan ug bonggo truck sa may Gensan Drive, Barangay Zone 4, alas-2:20 sa hapon kagahapong adlawa, Enero 2, 2017.
Giila ang biktima nga si Gil Bersamera nga taga Barangay Lamian, Surallah, South Cotabato, samtang angol ang asawa niini nga si Edna Bersamera ug anak niining si Shella Mae.
Nasayran nga sakay ang mga biktima sa motorsiklong gimanihuan ni Gil, angkas niini ang iyang anak ug asawa. Aksidenti silang nabanggaan ug bonggo truck nga gimanihuan ni Muhamad Abdula, residente sa Zamboanga City.
Nasayran nga padulong unta sa syudad sa General Santos si Abdula aron i-hatod ang kargang bulad apan pag abot sa lugar nabanggaan niini ang motorsiklo sa magtiayon nga miresulta sa kamatayon sa biktimang amahan.
Gilayong gipangdala sa ospital ang mga biktima apan nakabsan gyud ug kinabuhi ang amahan samtang nagpaalim sa ilang samad ang asawa niini ug anak. Sa karon anaa na sa kustudiya sa traffic management Unit sa Koronadal PNP ang driver sa bonggo truck nga nakabangga sa mga biktima.
