Gihatagan ug tukmang medikasyon ang usa ka babayeng mabdos nga nadakpan human nga gibiyaan sa iyang mga kauban sa nahitabong engkwentro Sitio Ulayanon, Barangay Kalabugao, Impasugong, Bukidnon niadtong Sabado sa hapon.
Sa interview sa RMN Malaybalay ngadto kang 4th ID spokesperson Lt. Tere Ingente, gibutyag niini nga sa inisyal nga rebelasyon sa suspek nga si Susan Cabusao Guaynon, 22-anyos nga usa ka buntis, ug usa ka miyembro sa Headquarters Force NEO Compac sa North Central Mindanao Regional Committee nga usa ka NPA member usab ang iyang bana.
Nagtoo ang 4th Infantry Division (ID) Philippine Army nga daghan sila’g makuha nga impormasyon kalabot sa mga aktibidad sa New People’s Army (NPA).
Lauman usab daw nga daghan pa ug ibulgar ang nadakpan kung makanaug na kini ug mapailawom sa dugang imbestigasyon.
Matud ni Ingenete nga una nang gi-angkon sa mao nga grupo nga sila ang anaa sa likod sa pagpatay ni Impasug-ong Mayor Mario Okinlay kaniadtong 2014 ug ang brutal nga pag-ambush usab sa tulo ka sundalo sa Sitio Kaleb, Barangay Kibalabag, Malaybalay City, Bukidnon kaniadtong Pebrero 2017.
Una niini, narekober usab sa 8th Infantry Battalion gikan sa mga nakasibat nga 39 ka NPA ang duha ka AK47 rifles; AR18 rifle; caliber 30 M1 carbine rifle; M4 rifle; air gun; 30 backpacks nga adunay subversive documents ug personal nga gamit.
