Malaybalay City, Bukidnon – Nagmalampuson ang gihimong Christmas party sa mga coordinators sa Tatak RMN Fans Club, Inc. sa Kaamulan Folk Arts Theater, Kaamulan Ground, Malaybalay City.
Gitambungan kini sa 600 kapin kon kulang ka mga coordinators gikan sa 13 ka mga chapter sa tibook Bukidnon.
Sa iyang state of the club address, gipasalamatan ni Station Manager Richard Villaronte, nga mao usab ang founder ug chairman sa organisasyon ang mga bulawanong kakugi nga gitampo ug panaghiusa sa mga coordinators ug mga miyembro niini.
Base sa datos, mukabat sa P5,146,216 ang na-release nga tabang sa fans club gikan sa Enero 2017 hangtod Nobyembre 24, ning tuiga alang sa mga hingtungdan sa 1,021 nga mitaliwan nga mga miyembro.
Ang Tatak RMN Fans Club, Inc. gimugna tumong nga matabangan ang mga miyembro niini ilabina ang anaa sa kawad-on basta nasunod lamang ang palisiya sa organisasyon.
Kabahin kini sa Corporate Social Responsibility (SCR) sa radio station isip baylo sa suking tigpaminaw sa ilang kanunay nga pagpaminaw sa RMN DXMB Malaybalay.
Usa kini non-profit organisasyon sa mga tawong nagkahiusa nga tumong ug tuyo mao ang pagtabang sa uban.
Ang death assistance usa lamang sa mga programa sa Tatak RMN Fans’ Club gawas sa tree-planting, medical mission, clean up drive ug feeding program.
