Patay na sang nasapwan ang isa ka singko anyos nga bata nga babaye matapos ginpatay sang iya kaugalingon nga 27-anyos nga tiya kahapon sa Purok Casino, Barangay Miranda, banwa sang Pontevedra.
Sandig sa imbestigasyon sang Pontevedra Municipal Police Station, katapusan nga nakita ang bata sang iya mga himata las kwatro kahapon sang hapon sa ila ugsaran.
Natalupangdan sang iloy nga gulpi lang nga nadula ang iya bata.
Ini gali ang ginhagad sang suspek nga maglagaw-lagaw sa palibot.
Matapos nga nangayo sang bulig sa barangay, nasapwan ang bata nga patay na sa isa ka lamawan las nuebe sang gab-i.
Suno sa kapulisan, nagduda ang pamilya sang biktima nga ang suspek amo man ang tiya sini bangud madamo ang nakakita sa iya nga didto naghalin sa lugar kun sa diin nasapwan ang biktima.
Puno man sang lunang ang iya bayo kag tiil.
Sa record sang pulis, las dos kaina sang kaagahon ginkumprontar sang iloy sang biktima ang suspek kag didto iya gin-ako nga siya ang nagpatay sang bata pinaagi sa pagkuga kag paglublob sini sa lamawan.
Dugang pa sang otoridad nga sang ila gin-interogar ang suspek, iya ginsiling nga iya ginpatay ang bata agud magtimalos bangud masami siya ginaakigan sang iloy sini kag gin-alegar may deperensya sa paminsaron.
Positibo man sa laceration ang kinatawo sang biktima.
Ang suspek natalana nga pasakaan sang kaso kag detained karon sa Pontevedra MPS.
