Davao City – Usa patay samtang usa ang angol sa nahitabong disgrasya sa Sta. Maria, Davao Occidental bandang alas dose kaganinang udto.
Sa pakighinabi sa DXDC RMN Davao kang PO2 Gordillo sa Sta. Maria Municipal Police Station, patay ang 5 anyos nga bata human nga mabangga-i sa usa ka pick up ug nalagpot kini sa kalsada samtang ang pick up nahulog sa tulay sa may Kumasi bridge sa Brgy. Basiawan, Sta. Maria hinungdan sa pagkaangol sa driver.
Giila ang biktima nga si alyas James, 5 anyos nga taga Kumasi, Basiawan kinsa gideklarang dead on arrival sa balay-tambalanan sa Digos samtang angol karon ang driver sa pick-up nga giilang si Kapitan Renato Uralde, 53 anyos nga usa ka Brgy. Captain sa Talogoy, Malita, Davao Occidental.
“Ang sakyanan nga gidrayban ni Uralde nag travel gikan sa Sta. Maria padung Malita. Pag abot sa accident area, iyang vehicle nahulog sa uneven surface sa left shoulder sa dalan ug accidentally naigo ang pedestrian nga minor samtang naghulat og bus together sa mama ug lola. Mao to pagkadasmag nalagpot ang bata unya ang driver ug sakyanan naderetso nahulog sa sapa,” saysay sa pulis subay sa ilang gihimong inisyal nga imbestigasyon.
Padayon pang ginaimbestigahan sa kapulisan ang maong insidente ug naghulat pa usab og desisyon gikan sa ginikanan sa namatayng bata bahin sa pagpasaka og kaso batok sa driver.
RadyoMaN Renz Barbarona
