General Santos City — lima ka mga kanhing miyembro sa New People’s Army (NPA) nga misurender sa 73rd Infantry Battalion (73IB) ang nakadawat ug kinatibuk-ang ₱325,000.00 financial ug livelihood assistance gikan sa Comprehensive Local Integration Program (CLIP) sa Sarangani Province (SP) atol sa gihimong joint Provincial Peace and Order Council meeting ug Provincial Anti-Drug Abuse Council nga gipahigayon sa Roadhouse Hotel nga gipanag-iyahan ni Sen. Manny Pacquiao dinhi sa syudad sa General Santos City.
Usa ka simple nga awarding ceremony ang gipahigayon sa pagpanguna ni Sarangani Governor ug CLIP Committee Chairman, Steve Chiongbian Solon, DILG Provincial Director Flor Limpin, Col Tyne Bañas, Commander sa 1002nd Brigade ug Lt Col Marion Angcao, Commander sa 73IB kung asa personal nilang gitunol ang ₱65,000.00 nga cheke matag usa sa (5) ka former rebels nga gilangkuban sa ₱15,000.00 nga immediate assistance ug ₱50,000.00 nga livelihood assistance.
Ayha gihimo ang awarding sa tabang nga gihatag sa mga nahisgutan. Gipailawom una sila sa (3) ka adlaw nga healing ug reconciliation seminar nga gipangunahan sa Provincial Social Welfare and Development Office – aron nga sila matabangan sa subling pagbangon sa ilang kinabuhi human nga nagtago tago sulod sa taas nga panahon sa kabukiran.
Una nang gibutyag sa mga nahisgutan nga usa sa mga hinungdan sa ilang pagbalik sa sabakan sa gobyerno ang kakapoy ug gutom nga nasinatian samtang nag tago-tago sa tropa sa mga sundalo sa gobyerno ug ang kapakyasan matud pa sa mga lider sa NPA nga mahatag ang ilang saad nga hatagan ug ayuda ang ilang pamilya pinaagi sa kwarta ug bugas matag bulan.
