Sa report sa Santo Tomas Municipal Police Station (MPS), ang dinakpan mao sila JP, ulitawo, ug mga babayi nga sila alyas Kat, alyas Jen, alyas Juls, ug alyas Jojo, pulos mga residente sa Barangay Tibal-og, Santo Tomas, Davao del Norte.
Ang nahisgutan naaktuhan nga nangolekta og kwarta, bisan og wala kini permit gikan sa Securities and Exchange Commission (SEC).
Sa imbestigasyon, ang maong giingong investment scheme nahimutang sa usa ka commercial building sa Barangay Tibal-og nga gi-operate sa DAILY-PROFIT MARKETING CONSULTING Office ug giingong gipanag-iyahan sa usa ka alyas “Mario”.
Nakuha sa nahisgutan ang mga butang nga ginagamit sa ilang operasyon sama sa record books, ball pen, stamp pad, calculator, marketing brochure, receipt stub, beauty products, ug uban. Nakuha usab ang P30,450 collection money, lakip na P5,000 nga marked money.
Gikumpirma sa SEC nga dili rehistrado ang maong opisina ug ang mga dinakpan aktibong miyembro sa maong marketing establishment.
RadyoMaN Kirby Manzon
