TACLOBAN CITY – May bag-o nga modus yana iton mga suspek, ha gindumara nga entrapment operation kakulop han Tacloban PNP station 1 dakop an mga suspek nga nagpanggap nga mga pulis.
Nagpabulig ha pulisya an Branch Manager han Lils Lending Shop nga hi Angelica Villota matapos nga pumakadto ha ira opisina an uunom nga mga suspek nga magpafile hin loan kumo daw in hira in mga pulis.
Ginkilala ini nga hira *JM Piolo Leuterio a.k.a PO1. Eliazar Recto Barbaje*, 18 anyos, waray asawa, usa nga merchandiser ngan residente ha Brgy. 94 Tigbao Diit, han Tacloban. *Romilyn Cerida a.k.a PO1. Ma. Mae Panis Dumas*, 28 anyos, may asawa, usa nga online seller ngan residente ha Brgy. 106 Sto. Nino, New Kawayan han Tacloban. *Sheryll Dugay a.k.a PO1. Christine Rarugal Varquez*, 37 anyos, waray asawa, self-employed ngan residente ha Brgy. 110 Utap zone II. *Angelica Daban a.k.a PO1. Zarah Jane Acol Dizon*, 38 anyos, waray asawa, waray trabaho ngan residente ha Brgy. 89 San Jose. Ngan hi *May Ann Canona a.k.a PO1. Christita Bandola Viovicente*, 29 anyos, may asawa, usa nga HQ employee ngan residente ha Brgy. 59-A Sampaguita dinhi ha Tacloban.
Sumala kan PCInsp. Alex Echon TCPO station 1 commander, narelesan pa an tutulo nga suspek hin nagkakantidad 100, 000 pesos ha ira ginbuhat nga loan.
“More or less an ira application P100,000.00 ngan naapply talaga nira an hundred thousand hini nga tulo nga suspek.”
Ha bulig han Regional Personnel and Human Resource Doctrine Division nabaruan nga diri mga pulis an mga ini ngan peke iton mga dukumento nga ira gingamit para makapag loan hin kwarta.
Tanan nga mga peke nga dokumento nakalusot ha mao nga Lending Shop para makapag loan.
Sidngon pa ni Echon nga bag-o ini nga modus hiton mga suspek.
Maatubang an mga ini ha patong-patong nga mga kaso nga Usurpation of Authority, Falsification of Public Documents, Forgery ngan Syndicated Estafa.
Abiso han opisyal ngadto ha mga establisyemento nga maghirot ngan diri magpa uwat ha sugad hini nga modus.
Igindara na an mga suspek ha Tacloban City Police Office para mapaslak an mga ini.
