General Santos City—Himas rehas na sa Silda sa Police Station 4 ang lima ka mga personahe kansa nasikop sa gihimong buybust operation sa kapulisan inabagan sa PDEA-12 nga gipahigayon sa Pahulayan Inn nga nahimutang ilawom sa area of responsibility sa Police Station 4 alas 8:10 ang takna sa gabie.
Mga suspek nailang silang si Jungie Dumoloy, 48, residenti sa Butuan City; Mervin Langgamin, 20, Pagadian City; Arturo Lumipig, 32, residenti sa Barangay san Isidro, Jhon Maverick Perez, 18, Residenti sa Barangay San Isidro, Gensan; Janet Aviera, 35 anyos nga taga Davao City.
Sa report sa Police Station 4 nasuta nga nakadawat sila ug report ga matud pa dunay grupo nga kadudahan sa maong lugar mao nga naghimo dayon ug operasyon kung asa usa ka pulis ang nagpakarong-ingnong mupalit ug iligal nga droga sa usa sa mga suspek nga si Jungie didto mismo sa girentahang lawak sa Pahulayan Inn.
Dihang gidawat na sa suspek ang marked money nga P500.00 didto na kini giposasan sa kapulisan.
Narekober gikan posisyon ni Junjie ang usa ka sachet sa gituohang shabu, P500.00 nga marked money ug 91 ka buok nga peke nga tag 1,000 pesos.
Samtang nakuhaan usab ug ubay-ubayng sachet sa gituohang shabu ang nakumpiska sa kapulisan ngadto sa mga kaubanan sa suspek.
Kasong kalapasan sa RA 9165 ang gikatakdang atubangon sa mga suspek ingon man kasong kalapasan sa paghupot ug peke nga kwarta.
Samtang ginasuta na usab sa awtoridad kung organisadong grupo ang mga suspetsado.
