Davao City- Buot nga magpahimo og profile ni Davao City Councilor ug Committee of Transportation chair Conrado Baluran ngadto sa mga hingtungdang ahensya sa mga Public Utility Vehicle (PUV) ug Public Utility Jeepney (PUJ) drivers dinhi sa syudad sa Dabaw aron mahibal-an og kinsa kadtong dunay bad record sa balaud trapiko.
Kini ang pamahayag ni Konsehal Baluran atol sa interbyu sa DXDC RMN Davao kabahin sa nagsugod na og release kaganina ang Land Transportation Office kun LTO XI og Driver’s License Card nga dunay 5-year validity.
Sumala sa konsehal, nag unang concern niini mao ang mahimong lima na ka tuig ang validity sa driver’s license sa malapason nga mga drayber sa balaud trapiko diin sumala pa dili angay mu-transport og mga pasahero og dunay suicidal tendencies hinungdan nga nagpahigayon ang LTO XI, LTFRB XI ug CTTMO og Drivers’ Academy dinhi sa dakbayan aron ma-edukar ang mga drayber sa road safety ug good driving habits.
“Kailangan isiguro nato nga mahatagan og driver’s license kadtong deserving nga mu-transport og pasahero, dili lang tong mga drivers nga kabalo mu-drive pero naa diay suicidal tendencies, di ta gusto maghatag og ing-ana kataas (validity) nga driver’s license sa mga drivers nga buluyagon,” sigun ni Baluran.
Dugang ni Councilor Baluran, pabor ngadto sa mga private vehicle drivers sama sa doktor, abogado, ug uban pa ang maong bag-ong validity sa lisensya tungod ang uban busy na oh dili na ka-renew ug dili na makaadto sa buhatan sa LTO.
Kahinumduman nga nagsugod na og release sugod kaganina ang LTO XI ug ubay-ubay sa mga drayber sa rehiyon XI ng mikuha na sa ilang 5-year validity driver’s license card.
RadyoMan Renz Barbarona
