Davao City – Wala nay kinabuhi ang usa ka 50 anyos nga lalaki nga nakaplagan sulod sa compound sa Vicente Lao Construction sa may KM. 12, Panacan, Davao City niadtong adlawng Martes.
Giila ang biktima nga si Melvin Madridano, minyo, maintenance ug stay-in sa naasoy nga kumpanya.
Sumala sa Sasa PNP niresponde sila sa maong area human nga nakadawat sila og tawag sa sekyu nga adunay patayng lawas sa maong compound.
Sa gihimong joint investigation sa Sasa PNP ug SOCO sa pagpanguna ni PSI Pajiente bandang alas 7 sa buntag niadtong Martes nakit-an sa mekaniko nga si Jerry Paglinawan ang biktima nga nagbuy-od sa salog duol sa hagdanan sa maong lugar.
Sumala sa mga imbestigador posibleng ang gikamatay sa biktima ang pagka-igo sa ulo niini sa semento human kini nangihi ug nadalin-as sa hagdanan.
Gibutyag sa kapulisan nga walay foul play sa insidente.
Gidala ang patay’ng lawas sa biktima sa Rivera Funeral.
RadyoMaN Aimee Guinita
