Mukabat ngadto sa 500 ka mga miyembro sa tribong Matigsalog, Umayamnon ug Manobo ang naghiusa sa lungsod sa Don Carlos, Bukidnon kaniadtong Biyernes aron kondenahon ang 50 ka tuig nga pagpanglimbong matud pa sa grupong CPP-NPA ngadto sa IP communities.
Matud sa Lumad Mindanao Movement for Development Inc. (LMMDI) nga gipangunahan ni Datu Bravo nga nang-recruit ang mga NPA sa nakalabay nga 50 ka tuig sa ilang mga kabataan ug gihimong mga combatant.
Gawas niini ilang gidala pa matud pa ang ilang mga kalalakin-an palayo sa ilang mga ancestral lands ug gitudluan nga makigbisog batok sa gobyerno ug gigamit sa mga NPA Cadres isip mga front liners sa pakig-away batok sa mga tropa sa gobyerno.
Gipasanginlan usab ni Datu Bravo ang mao mga NPA nga gipangpatay niini ang pipila ka mga tribal leaders aron makabutang sila ug ilang gitawag nga “puppet Datu”.
Samtang nanawagan usab ang LMMDI ngadto sa mga NPA nga mahimong makalmahon ug makighiusa na lamang sa gobyerno alang sa pagkab-ot sa kalinaw ug kalambuan.
Nasayran nga ni-apil sa mao nga kalihukan ang pipila ka miyembro sa Naghiusang Mag uuma Agrarian Reform Cooperative (NAMARCO) nga tag-iya sa Backhoe nga gisunog sa mga NPA kaniadtong Marso 15 ang aron pangayoon ang ilang kompensasyon gikan sa NPA isip human nga nawad-an sila ug panginabuhian ug ikapa-kaon sa ilang mga pamilya.
