Davao City – Dul-an 500 ka mga motorista nadakpan dinhi sa Davao Region atol sa gilusad nga ‘One Time, Big Time’ operations sa Land Transportation Office (LTO-XI) nga gipahigayon niadtong November 22, 2019.
Sumala ni Atty. Loida Igdanes, Legal Officer sa LTO-XI, sagad sa mga dinakpan adunay kalapasan sa overloading, walay sul-ob nga crash helmet ug wala nagagamit og seatbelt, lakip na ang pagpasakay sa likod sa mga cargo trucks diin 48 na ang nasikop.
Gipang-isyuhan ang mga dinakpan og TOPs ingon man citation tickets diin ang mapamatud-an nga nahilambigit sa Anti-Drunk and Drugged Driving Act pasakahan og kaso.
Sa datos sa LTO-XI, anaa na sa kapin 50,000 ka tawo nasikop sugod Enero hangtod Oktubre karong tuiga.
Giklaro ni Igdanes nga wala niundang ang ilang operasyon taliwala sa mga reaksyon nga migula karon nga ‘weather- weather’ lamang sila kun mag-operate.
Gani, nagapaabot pa sila sa LTO Central Office kung kanus-a subling ipahigayon ang laing daku na usab nga operasyon.
Ang ‘One Time, Big Time’ operation inabagan sa LTO, PNP ug deputized LTO agents.
RadyoMaN Jason Amisola
