General Santos City–Mukabat ngadto sa kapin P50,000.00 ang gibana-banaang damyos sa nahitabong sunog sa usa ka balay nga gipanag-iyahan sa usa ka Genaro Rogan Sr., nga nahimutang sa Rogan Subd. Barangay Lagao ning syudad alas 2:30 ang takna sa hapon.
Sumala pa ni SFO1 Filamer Acub, ang arson investigator sa BFP-Gensan nga sa karon nagpaabot pa sila sa ihatag nga affidavit sa biktima aron matumbok nila ang saktong kantidad sa mga nasunog nga gamit sulod sa maong balay.
Samtang padayon pang ginasuta karon sa otoridad kung unsa ang hinungdan sa nasangpit nga sunog human nga migula sa ilahang imbistigasyon nga nag sugod ang kalayu sa kwarto sa nasangpit nga biktima.
Dugang pa ni SFO1 Acub nga sa maong higayon walay laing tao sa maong lugar kundi ang biktima ug ang iyahang mga apo nga natulog sa pikas balay sa ilahang compound.
Gipukaw nalang matud pa kini sa mga silingan tungod kay nag dilaab na ang balay niini, gisuwayan pa nila ug pasirit ug tubig apan paspas nga gilamoy sa kalayo ang balay human nga katunga niini gama sa light materials.(Dave Silagan)
