Davao City – Gikumpirma karon sa Davao City Police Office (DCPO) nga 52 ka mga barangay sa syudad ang napailawom sa orange category kun hugot nga tutukan sa umaabot nga May 13 midterm elections.
Sumala ni DCPO chief Col. Alexander Tagum, gilangkuban kini sa mga hilit nga lugar sa Paquibato, Marilog, Baguio, pipila ka area sa Calinan ug Buhangin.
Pagpasabot ni Tagum nga nakusidera ang maong mga lugar sa orange category gumikan apektado kini kaniadto sa operasyon sa New People’s Army (NPA).
Apan giklaro usab sa maong hepe nga sa pagkakaron base sa intelligence report sa Intelligence Committee, walay namonitor nga lihok karon sa maong rebeldeng grupo.
Hinuon gipaniguro niini nga anaa ug andam mutabang ang mga personahe sa 1003rd Brigade ngadto sa lokal nga mga Police Stations aron mapaniguro ang hapsay ug malinawon nga piniliay.
“Nagsimula na ang kanilang (1003rd Bigade) full support sa ating local police station na peaceful and orderly ang area ang to ensure na ang possible intrusion ng considerd natin na ending of the state will not happen during the election,” saysay niini.
Samtang gimando ni Police Regional Office (PRO-XI) Regional Director Maj. Gen. Marcelo Morales nga magdugang og mga personahe sa Davao del Norte partikular sa Unang Distrito gumikan sa nahitabong pagpamusil sa igsoon sa Mayor sa New Corella lakip na usab sa Davao del Sur.
RadyoMaN Jason Amisola
