General Santos City—Pakyas nga madakpan sa operatiba sa PDEA 12, Militar ug kapulisan sa Cotabato Province ng tulo ka mga target sa gihimong Search warrant Operation nga gipahigayon sa Purok Makabimban, Kabacan, Cotabato Province, apan malampuson usab nga narekober ang mukabat sa 52 ka sachet sa gituohang shabu atol sa maong operasyon.
Nasayran nga ang target sa Search warrant operation mao silang si Unson Baliwan Alias Kumander Omega, Paulo Baculodan Alias Pawakan ug Narcisa Baliwan aka Narcisa Baliwan Baculodan.
Nasayran nga alas 5:30 sa buntag dihang unang gisulod sa tropa sa PDEA uban ang kapulisan ug militar ang balay sa magtiayong Paulo Baculodan ug Narcisa Baliwan apan pakyas silang madakpan ang mga nahisgutan human nga nakamatikod sa presensya sa awtoridad.
Narekober sa panimalay sa mga suspek ang (45) ka small sachets sa suspected shabu nga dunay timbang nga pito ka gramo nga gibana-banaang mukabat sa P47,600.00.
Samtang alas 7:00 sa buntag gisulod sa awtoridad ang balay ni Kumander Omega nga miresulta sa pagkarekober sa (6) ka small ug (1) ka medium sachet sa suspected shabu nga dunay timbang nga 6 ka gramo nga gibana-banaang anaa sa P40,800.00.
Si Kumander Omega apil sa target-listed drug personality ug usa ka MILF Commander. Ang area sa operasyon niini sa pagpamaligya ug iligal nga droga anaa sa Cuyapon, Kabacan ug uban pang munisipalidad sa probinsya sa Cotabato.
Bisag nakaikyas ang mga nasampit kasong kalapasan sa Section 11 (Possession) sa Article II sa Republic Act 9165 ang ipasang-at batok sa mga suspek.
