Davao City – Gikumpirma ni Davao City Mayor Sara Duterte-Carpio nga adunay mga frontliners sa syudad sa Davao nga nagpositibo sa Coronavirus Disease 2019 (COVID-19).
Matud sa alkalde base sa nakuha niining latest data sa Southern Philippines Medical Center (SMPC), 56 ka mga health workers ang nagpositibo sa maong virus hinungdan nga nahurot na ang Trust Fund nga gihatag sa alkalde isip financial aid alang sa magkasakit nga health workers sa maong ospital.
“Sa health workers nato, ang last nakong nakuha nga listahan gikan sa SMPC, 56 kabuok ang ilahang health care workers nga confirmed COVID-19 positive,” butyag ni Mayor Sara.
Samtang, duna usay bag-ong nagpositibo nga trabahante sa City Government of Davao human kini na-expose sa pagtrabaho sa COVID-19 Temporary Treatment and Monitoring Facilities sa syudad ug usa usab ka personahe sa Davao City Police Office (DCPO) ang nagpositibo tungod na-expose sa pagpatrolya sa Barangay 23-C human kini gipailawom sa hard lockdown.
RadyoMaN Kirby Manzon
