59 anyos nga nanay, ginpatay han iya kalugaringon nga anak ha Tacloban

2602

TACLOBAN CITY – Ginburubalbag hin martilyo han 24 anyos nga lalaki an iya nanay ha Brgy. 106 Sto. Nino, Tacloban City, alas 6:30 kagab-i.

Basi ha report han Tacloban PNP Station 2-Abucay, ginkilala an suspek nga hi Germas Ondes Betor, waray asawa, residente ha nasabi nga lugar.


Ginkilala naman an biktima nga iya nanay nga hi Delia Ondes Betor, 59 anyos, residente ha nasabi nga lugar.

Ha nagawas nga imbistigasyon han mga otoridad, an bugto han suspek nga hi Fredie, may asawa ngan usa nga construction worker in mabisita unta ha panimalay han iya nanay han matapuan niya an iya bugto nga hi German nga naglalaksi pagdalagan ngan puno hin dugo an tuo hini nga kamot.

Ginpakianhan ni Fredie an iya bugto nga kun kayano mayada dugo ini ha kamot, an baton naman han suspek “ginpatay ko hi nanay pati an ayam ni kapitan, pagkita ko ha ira aswang.”

Dali-dali hi Fredie nga pumakadto ha panimalay han iya nanay ngan didto nakit-an niya ini nga waray na kinabuhi.



Nagpabulig hi Fredie ha barangay ngan naaresto naman an bugto niya nga suspek.

Ha interview han RMN kan PSInsp. Edwin Canamaque, Tacloban PNP Station 2 Commander, maiha na nga nagamit hin violatile substance o kun ‘rugby’ an suspek.


“Basi han iya bugto ngan han iya uncle, maiha na daw ini nagamit hin rugby ngan problema ngani ini ha ira [pamilya] kay usahay allegedly gintatarhog an iya nanay nga papatayon.”

Ginpatay gihapon han suspek an ayam ni Brgy. Kapitan Alden Villarmino ngan ginruba an glass window han Brgy. Hall.

Ha pagka yana, paslak na an suspek ha Tacloban PNP Station 2-Abucay ngan papasakahan hin kaso nga parricide.

Facebook Comments