Dead on arrival sa ospital ang isa ka persona, matapos nga tiruhon sa National Highway, Prk 1, Brgy. Crossing Palkan Polomolok, South Cotabato, alas 4:40 sang aga sang Setyembre 28, 2021.
Ginkilala ang biktima kay Rodolfo Cuaresma Dela Reyna, 59 years old kag residente sang Prk 15, Brgy Polonuling, Tupi, South Cotabato.
Sa inisyal nga imbestigasyon sang Polomolok MPS, nagamaneho sang top down ang biktima agud magbakal sang pinya, apang pag-abot sa Prk 1, Brgy Crossing Palkan gintiro sang makapila ka bes sang wala nakilal-an ang mga suspek ang biktima.
Gindala pa sa ospital ang biktima, apang gindeklarar nga patay sang doktor nga nag-atipan.
Nakuha naman sa crime scene ang topdown, 3 ka basyo sang ginapatihan kalibre 45 nga armas luthang kag iban pa.
Sa subong padayon ang imbestigasyon sang Polomolok MPS sa nasambit nga insidente.
