Arestado ang usa ka negosyante ug ang kauban niini sa gipahigayong anti-drug buybust operation sa PDEA-BARMM, 82nd Infantry Battalion, Philippine Army ug Marawi police, sulod sa Mindanao State University o MSU campus sa Marawi City, pasado alas-11:00 kagahapon sa buntag.
Giila ni Juvenal Azurin, regional director sa PDEA-BARMM, ang duha nga sila si Jamal Manumbilao Tocalo ug Muhajir Usman Samad.
Si Samad adunay negosyo nga ready-to-wear o RTW products sa Iligan City samtang si Tocalo walay klarong trabaho, taga-Maguing, Lanao del Sur.
Nakuha gikan sa duha ang gituohang shabu nga nagkantidad og 6.8 million pesos.
Nakuha usab gikan kanila ang fake money nga maoy gigamit sa buybust operation nga nagkantidad og 1.6 million pesos, nga maoy kantidad sa transaksiyon, ug ang tinood nga kwarta nga nagkantidad og usa ka libo ka pesos.
Matud pa ni Azurin nga naa sa drug watchlist ang duha nga gipailawom sa surviellance niadto pang nakalabay’ng tuig. (Divina M. Suson, )
