Davao City- Napalgan sa bagnutan nga wala nay kinabuhi ang 6 anyos nga batang babae kinsa gikatahong na-missing sukad pa niadtong Setyembre 17,2018.
Dugta na ang patay’ng lawas sa biktima ug gihiktan pa og electrical wire ang iyang liog ug tiil.
Gibutyag ni DCPO City Director Senior Supirentendent Alexander Tagum atol sa interbyu sa RMN Davao nga susihon sa himuong awtopsiya aduna bay foul play sa kamatayon sa bata.
“Tanawon namo kung naa bay foul play ang caused of death sa bata ug kung gihilabtan ba ang bata o na-rape. After that kung makit-an namo kung adunay foul play that’s the time nga i-expand namo among investigation into criminal investigation to determine kinsay involved. Part sa forensic investigation nato will be the extraction of a DNA sample,” sumala ni Tagum.
Matud ni Tagum nga usa ka makuting imbestigasyon gayod ang ilang himuon ug kini maoy mando niya sa labaw sa Talomo PNP nga si PCI Ronald Lao.
“Naghatag nako’g instruction ani that to ensure that during the conduct of the investigation lantawon ang all angles towards the solution of the case,” segun niini.
Subay niining panghitabo adunay pasidaan si Tagum sa tanang mga ginikanan.
“Dapat mahimo tang responsable nga magbantay ta sa atong mga anak one minute pa lang mga dili ninyo makita inyong anak dapat magpakabana namo ug maalarma na mo,” sumala niini.
Samtang giimbitahan usab sa kapulisan sa Talomo ang nakadiskobre sa patayng lawas sa bata nga si Rico Jay Lauron Labao tungod sa ‘inconsistency’ sa iyang testimonya.
Lakip sa giimbistigahan sa mga awtoridad ang mga wires nga nakita sa balay niini nga susama sa wire nga nakahigot sa batang biktima.
Dugang niining report gihatagan usab og atensyon ni Tagum ang gipadangat nga impormasyon sa giiingong nagapangbunlot og bata nga naka-motorsiklo ug iyang gimanduan ang iyang mga personahe nga imbestigahan usab kini.
RadyoMaN Aimee Guinita
