Nasapwan nga wala na sang kabuhi ang 6-anyos nga bata nga babaye sa Allah River sa Prk. Kaunlaran, Brgy. Bambad, Isulan, Sultan Kudarat, pasado alas 9 kahapon sang aga.
Ginkilala ang biktima kay Maria Dagohoy Banaag, residente sang Prk. Capitol West Kalawag, Isulan, Sultan Kudarat.
Suno sa tatay sang biktima nga si Bernie Banaag alas 3:30 sang Miyerkules nga adlaw, Enero 27 nagpadulong sila sa balay sang iya nga iloy agud magtambong sa birthday sang iya nga hinablos ukon pakaisa sang biktima sa Purok Lupok, Brgy. Kolambog sa nasambit nga banwa.
Naghampang suno pa ang bata sini upod ang pakaisa sa lugar, apang sang papauli na sila sang gab-i sa amo nga adlaw ginpangita ini sang iya nga asawa amo nga ginbilin na lang nila tungod nagpasalig man ang lola nga pangitaon sini ang apo, matapos nga nagapati nga nagahampang lang sa palibot kag kumpyansa man sila tungod halos paryenti nila ang yara sa lugar.
Apang sang maghimos na nga matulog kagab-i ang lola sini wala na nakit-an si Maria amo nga nag-impormar sa iya nga nadula ang bata.
May-angot sini, suno kay Bernie nangayo sila sang bulig sa Brgy. opisyal sang Kolambog kag kapolisan agud nga pangitaon ang bata, apang nakit-an ini nga patay na kagaina sang aga.
Nagapati naman ang pamilya nga ginhimuslan ang bata amo nga nagasinggitan sang hustisya.
Samtang suno naman kay Isulan Chief of Police PLTCOL Romeo Galgo padayon pa ang ila nga imbestigasyon.
Ipaidalom man suno pa sa utopsiya ang bangkay sang bata agud mahibaluan kon ginhimuslan ang ini kag kon ano ang nangin tunaan sang kamatayon sang biktima matapos nga may nakit-an nga pasa sa leog sini.
