6 ka empleyado sa LGU Surigao City nag-positibo sa Random Drug Test Sumaya pa ni Atty. Manuelito Delani, an Action Officer nan City Anti-Drug Abuse Council ug City Legal Officer, may resulta na sa tagpahigayon na random drug test pipila ka buyan na an milabay. Ini sa 205 ka personahe gikan sa lain-laing departamento sa siyudad. Sa resulta,may 6 na nag-positibo sa tagtawag na substance abuse, 3 niini an mga Traffic Enforcers, isa gikan sa City Health Office, Isa sa City Eng’g., hinoon an laing isa pa an waya na magtrabaho sa gobyerno sa siyudad. Human sa resulta sa random drug test an matud pa ija tagpatawag an 6 ug taghatagan nan tsansa para magbag-o. Lakip an pahimangno na may laing Confirmatory Test na ila himoon ug kon magpositibo gihapon an tangtangon na sa trabaho. Dugang pa ni Atty. Delani, personal nija na opinyon kon magpositibo sa test, diretso ini tangtangon pero kay may proseso man, kinahanglan sija na mosunod. An amo na pamahayag ni Atty. Delani agig reaction human an naunang pag-question nila ni City Councilors Christian Noel Catre ug Jose Edradan Jr. sa listahan ug resulta sa drug test labi na sa mga Traffic Enforcers.
