General Santos City—Unom ka mga tawo ang nadakpan sa sunod sunod nga buy-bust operation sa managlahing lugar dinhi sa dakbayan sa Gensan.
Alas 2:00 sa hapon kagahapong adlawa unang nasikop sa operatiba sa Police Station 5 sa pagpanguna ni Police Major Basher Alindo ang usa ka Owen Sature, 38 anyos nga taga Purok New Bohol, Barangay Calumpang human kining napalitan ug usa ka sachet sa gituohang shabu gamit ang P500.00 nga marked money.
Sa gihimong enterogasyon, gisumbong ni Satore ang iyang kaubanan sa iligal nga gimbuhaton nga mao si Crispolo Barte, 33 anyos nga taga Purok Cahilsot, Barangay Calumpang. Napalitan usab kini ug usa ka sachet sa gituohang iligal nga droga.
Samtang dakpan usab si Jerson Millan, legal age nga taga Lily of the Valley Extension, Barangay Calumpang Gensan kansa konektado usab sa duha nga una nang nadakpan. Apil gisikop ang live in partner niini nga si Shella Mae kansa naaktuhang naghithit ug iligal nga droga dihang gihimi ang buy-bust operation ngadto sa iyang kapuyo.
Samtang sa gihimong laing follow-up operation nga gihimo sa Police Station 1, alas 8:40 ang takna sa gabie, nadakpan ang usa ka Ramil Rubio, tricycle driver nga taga Barangay Calumpang, Gensan. Nadakpan ang nasampit sa Darimco street, Barangay West, pinaagi sa buy-bust operation diin napalitan kini ug usa ka sachet sa gituohang shabu.
Uwahing nadakpan ang usa ka Ranilo Dalogdog, alias Dodong, legal age nga taga Purok P. Acharon, Barangay West, Gensan. Nadakpan ang nasampit sa Landing Park, Barangay West diin napalitan kini ug usa ka sachet sa gituohang shabu gamit ang P500.00 nga marked money.
Si Dalogdog ang gikaingong igsuon ni Randy Dalogdog kansa napatay sa gihimong operasyon sa kapulisan simana na ang nakalabay nga gipahigayon sa National Highway, sakop sa Barangay Apopong.
Sa karon giandam na sa kapulisan ang pagpasang-at ug kaso batok sa mga suspetsado.
